लोकनीती न्युज
पुणे : पीएमपीएमएलने सार्वजनिक बससेवेच्या तिकिट दरात केलेल्या मोठ्या वाढीविरोधात आम आदमी पार्टी (आप) तर्फे स्वारगेट चौकामध्ये जोरदार आंदोलन करण्यात आले. ही दरवाढ सामान्य पुणेकरांसाठी अन्यायकारक असून त्यामुळे प्रवाशांची संख्या घटेल, वाहतूक कोंडी वाढेल आणि प्रदूषणाचे प्रमाणही अधिक होईल असा इशारा आपतर्फे देण्यात आला. पीएमपीएमएलच्या संचालक मंडळाने नुकताच निर्णय घेऊन किमान तिकीट दर ५ रुपयांवरून १० रुपये, दैनंदिन पास ४० रुपयांवरून ७० रुपये आणि मासिक पास ९०० रुपयांवरून तब्बल १५०० रुपयांपर्यंत वाढवला आहे. ही दरवाढ सर्वसामान्यांना परवडणारी नसून त्यांच्या खिशावर मोठा भार टाकणारी आहे असे आम आदमी पार्टीच्या कार्यकर्त्यांनी आंदोलनात स्पष्ट केले. प्रशासनाने वार्षिक तूट भरून काढण्यासाठी आणि दर कीफायतशीर व सुलभ करण्याच्या उद्देशाने ही दरवाढ केल्याचे सांगितले असले, तरी त्यामुळे मुख्यतः रोजंदारीवर काम करणाऱ्या मजुरांना व सामान्य नागरिकांना मोठा आर्थिक फटका बसणार आहे. परिणामी लोक खाजगी वाहनांकडे वळतील आणि त्यामुळे वाहतूक कोंडी व प्रदूषण वाढणार आहे, असा ‘आप’चा आरोप आहे. दरवाढीऐवजी उत्पन्नाचे पर्यायी मार्ग शोधणे, मेट्रो एंड-माईल कनेक्टिव्हिटी मजबूत करणे, तसेच प्रशासनातील भ्रष्टाचार व अकार्यक्षमता दूर करणे, अधिक बसेस उपलब्ध करून देणे आदी उपाय करणे गरजेचे असल्याचे ‘आप’चे मत आहे. या दरवाढीविरोधात जिल्हाधिकाऱ्यांनी प्रवासी संघटनांसह नागरिक व राजकीय पक्षांचे मत घेऊन निर्णय घ्यावा, अशी मागणी आपने केली आहे. अन्यथा पुढील काळात आणखी तीव्र आंदोलन छेडण्याचा इशाराही त्यांनी दिला.
